Your cart is currently empty!
演唱會消息
黃子華力邀劉嘉玲合演舞台劇 《香港式離婚》定12月公演暫開40場
黃子華與劉嘉玲合作舞台劇《香港式離婚》宣布12月開演，今日下午舉行發布會，兩位主角聯同其他演員楊淇、楊詩敏、梁浩邦、舞台劇監製王耀祖、編劇黃詠詩等一同出席。 《香港式離婚》由陳淑儀擔任導演，服裝設計是張叔平，更是黃子華與劉嘉玲首次合作。今日發布會上，子華表示當初想起用全舞台劇演員，又笑指原因是舞台劇演員夠「窮」，不過女主角一職，他突然決定推返之前想法，感覺神遇般想起劉嘉玲是最佳人選，結果力邀絕對唔窮的嘉玲姐演出，他在台上更稱細細個就睇劉嘉玲。至於再接舞台劇，劉嘉玲坦言初時打算推辭，因為每次演舞台劇均很大壓力，經理人過兩日再透露男主角是黃子華，使她改變主意慎重考慮，結果想了數月，她與製作人及子華是在過年前見面談合作，大讚子華有個人魅力、好吸引，她亦認為應該尋求挑戰，唔應該躺平，故最終決定演出。 驚得罪sponsor子華神則稱，2018年曾分享自己有三套欣賞的香港舞台劇，《香港式離婚》就是其中一套，恨演多年終於如願，劉嘉玲就指今日來到發布會，見到贊助商全屬女高層，並說：「我相信佢哋返到屋企有自己嘅問題，家庭嘅問題、情感嘅問題，可能佢匿埋喺間房…」子華即抵死地提醒說：「小心呀sponsor！sponsor！」劉嘉玲還說：「我講嘅係真㗎喎！」當被問到自己事否也有家庭上的難題，她稱：「點可能冇問題？我話俾你聽冇問題係呃你。」目前，《香港式離婚》已開始圍讀，由排練到演出花上幾個月，更會橫跨聖誕到新年公演，劉嘉玲不惜犧牲去旅行等私人時間，今日公布假香港演藝學院歌劇院的40場演出將於12月13日開鑼，票價分五種，最貴$1280、$1,080、$880、$680及最平$480，王耀祖表示儘可能將大量門票作公開發售。 坦言角色有共鳴《香港式離婚》曾四度搬上舞台，今次以神級陣容再度公演，故事發生在一間專辦離婚的事務律師行，子華、嘉玲分飾貌合神離、結婚多年的中產律師夫婦。今日發布會結束後，幾位演員接受訪問，劉嘉玲坦言接演前，有認真考慮體力及精神上是否應付得來，更不想拖垮整個舞台劇。子華再三強調認為嘉玲姐是女主角不二之選，他稱約對方在一餐茶上逾一個小時不斷遊說，自言：「呢世人未咁用力去sell一件事！但係我覺得佢真係太適合呢個角色。」兩人為舞台劇熟讀不少資料，嘉玲坦言今次角色好有共鳴，被問到犧牲今年聖誕到日本滑雪，她認為並不是犧牲，可能是得到更加多，子華即搞笑說：「點解冇人會覺得我犧牲咗？我畀人嘅感覺，淨係得閒會去深水埗飲奶茶，我都有我嘅生活㗎。」黃子華最新電影《破．地獄》落實11月14日上映，他表示不會撞宣傳，透露排練上會作好安排，劉嘉玲亦稱好期待拍檔新片《破．地獄》。
4 min read
周慧敏宣布下月開全新巡迴騷 收集歌迷舊合照擺上舞台
周慧敏宣布下月開全新巡迴騷 收集歌迷舊合照擺上舞台 周慧敏（Vivian）日前（16日）在社交平台宣布舉行《地老天荒愛一場-周慧敏巡迴演唱會》，首站將於8月31日在澳門倫敦人綜藝館開騷。 她為此正向各地粉絲徵求舊合照︰「好開心告訴大家，我今日影演唱會海報啦，請大家留起8月31號給我！這次的巡演《地老天荒愛一場-周慧敏巡迴演唱會》首站將會在澳門倫敦人綜藝館舉行，是《一萬天荒愛未老周慧敏演唱會》的2.0， 加入了全新rundown和舞台服，我將會全力以赴見大家。這次演唱會希望世界各地的支持者都能出現在我的舞台熒幕上，現開始收集各位和我的合照，請揀選一張你/妳最喜歡和我的合照發到以下郵箱，我們會作出適當的篩選，期待你們可以與我一起出現在8月31日和之後的舞台上。」 Vivian呼籲歌迷將與她的合照電郵至「 picsofyouandv@gmail.com」，截止日期為本月30日。
4 min read
周慧敏相隔七年再開演唱會 8月31日澳開倫敦人開騷
相隔七年沒開演唱會，周慧敏最近宣佈，將於8月31日到澳門倫敦人舉行〈地老天荒愛一場〉巡迴演唱會首站，演唱會門票將於8月2日 15:00 優先訂票，不少歌迷已經急不及待等著開售想撲飛。 等足七年真係等到天荒地老，終於周慧敏話開騷，歌迷當然係驚喜萬分！早前Vivian就為演唱會海報拍攝宣傳照，更於個人社交網站上透露，會有一個升級2.0 版的全新Rundown和舞台服裝，公開收集粉絲跟她的合照，希望可以安排於演唱會的屏幕上出現，分享這些年來大家跟她一起成長的過程，讓歌迷們即湧躍回應，令Vivian十分開心。 Vivian直言人生之中，佔去她大部份回憶的，除了家人，貓貓，好朋友，就是支持者了。每一個支持過她的人，都有份成就今天的自己，所以在還有能力和心力時，都希望能為愛她的朋友好好表演，回報他們的愛，「希望今次演唱會，除了以歌會友之外，我跟觀眾可以好似好朋友咁，來一次深情告白。」 擁有玉女掌門人兼凍齡女神的稱號的她，海報照狀態是超級驚人，無論身形或外貌都狀態大勇，Vivian坦言，自己仍是對身形未到最滿意，「手腳ok, 中央麻麻地，起碼條腰要瘦2吋，穿舞台服會好看一啲，不過我估到演出個日就會最fit㗎啦，因為我一忙就唔記得要食嘢，唔識餓㗎，每次開show都係咁，係咪好奇怪？今次更加係我嘅大挑戰，從來未試過得一個半月時間比我籌備一個演唱會，喺咁短時間處理咁多嘢，破晒我嘅紀錄，不過我唔想錯過每個可以令支持者開心的機會，所以當我經理人古巨基太太告訴我8月31號巡演開鑼，我愕然左一下，都開心地答應了，因為我心裏面滿有平安，相信團隊嘅看顧。我點都係個緊張大師，所以平時一直keep住定時去聲樂老師度練習，今次雖急，但心都定好多。製作上好多前期密集工作有時都搞到腎上腺素上升，好似為左搵新舞台衫，我同經理人透過一個網站訂購左一批來自不同品牌的高級訂製服，有d明明話四星期內會到，點知依家買左之後，網站通知話會八個星期甚至十二個星期先有，我地就開始心裏亮起警號，笑住話係咪騙案呀？D朋友話駛唔駛報東張？希望佢地只係少少延誤，唔好遲得太離譜甚至唔到啦，我哋因為咁，都做緊兩手準備啦，唔怕一萬最怕萬一。至於訂左幾多錢衫？唔好講啦，佢地真係送唔到嚟，搞到真係報東張個陣先講啦。哈哈。」 Vivian表示，近日已經開始為演唱會排舞，不停開會研究個唱內容，壓力是有但係感恩地每次返屋企，三隻貓都令她覺得治癒及放鬆，「見到佢哋，我同Joe都即刻就冧冧豬。」見Vivian係IG同貓貓 床上對話，一講會離家幾日，隻貓好似嬲左佢十分可愛搞笑，vivian笑住話，「係呀，個隻叫「豬皮」。其實三隻貓都好愛爸爸媽媽，不過豬皮明顯特別愛媽媽，好似眼中只有媽媽咁，我唔出街佢就最開心，Joe話我出trip嘅時候豬皮就冇晒心機，少咗叫少咗活動，反而其他兩個貓細佬就如常，細佬們有爸爸就可以。豬皮好多時候都等我返屋企先去便便，因為佢大肚腩自己清潔唔到，鍾意我幫佢清潔和極速清理砂盤嘅大小便。我唔喺屋企，佢連便便都會少啲，唉，陰公豬。所以我為左我啲貓開心，都好少出門去旅行，免得小朋友太掛住媽媽。我依家已經開始同豬皮，B B和Mike仔三個講定，媽媽遲下要行開幾日唔係屋企，希望佢地聽得明啦，同豬皮講果刻，佢一聽到就走開啦，希望唔係嬲嬲豬啦。」
4 min read
《披荊斬棘》沈震軒大整蠱-練習不啱beat忘詞-李克勤教到懷疑人生
內地競賽真人騷《披荊斬棘》第二集首次正式公演，首集李克勤跟沈震軒（Sammy）、秦昊、嚴屹寬成功組隊演繹週深的《人是_》，更被任命隊長，跟弟弟團隊進行追掔生存戰。 克勤作為隊長的同時，更是隊內核心，肩負起排練過程中的「班主任」，Sammy、秦昊跟嚴屹寬試圖整蠱李克勤，故意在排練時出錯，面對大家「不啱beat」、忘記歌詞等等問題，克勤差點陷入自我懷疑，直言：「初舞台的時候他們不是這個水平的，我的眼光沒有這麽差。」直到綵排前一刻還在糾正他們錯誤，沒想到瑤排時異常順利，讓克勤感覺隊員們彷彿換了個人，後來得知整蠱真相後更是哭笑不得，並表示要反擊。 在首場正式公演的比賽中，克勤帶隊出征，唱出末日戰歌《人是_》。隨著音樂緩緩響起，舞台遍布黃沙，坍塌的枯木訴說著末日的絕望，爆炸聲加重了旋律的悲壯，角落裡燃燒著火焰，李克勤在荒蕪之中歌唱。每個細節都透露著末日廢土的蒼涼與壯美，配合現場的真實爆破效果，讓人感受到了極大的視覺震撼與衝擊。
4 min read
Imagine Dragons兩年後再訪港 用不鹹不淡國語多謝歌迷「思」
獨立樂團Imagine Dragons闊別香港兩年幾終於再次光臨，《Imagine Dragons Evolve World Tour Live In Hong Kong》昨晚於亞洲博覽館Arena開騷，現場座無虛席。他們先唱出《I Don’t Know Why》與觀眾熱身，現場隨即進入迷幻氛圍之中。 Imagine Dragons主音Dan Reynolds雖然與港迷兩年無見，但中文依然見得嚇人，他以國語“思思”（謝謝）現場樂迷的支持，隨著他的“思思”引起不少觀眾笑聲。 當唱到2012年Hit爆之作《It’s Time》時，全場觀眾也跟著他們一起大合唱，全場的氣氛也推到高峰。主音Dan在台上表示今次訪港不幸患上感冒，所以在演出期間在台上準備了一杯茶，邊玩邊飲。雖然生病但無阻他的表現，現場氣氛依然high爆。
4 min read
張敬軒鄧麗欣默契十足 Ian處男聲演做足功課
歌手張敬軒、鄧麗欣（Stephy）、Ian（陳卓賢）、女圑Lolly Talk成員Sinnie及黃妍（Cath）特別客串，森美及《十八樓C座》金剛、陳慕賢及朱雪梅等，亦有參與聲演電台廣播劇《微涼之夏》。劇中軒仔及Stephy分別飾演「關Sir」及「葉細細」，一對識於微時的屋邨街坊。 今次是Stephy與軒仔首度合作聲演廣播劇，原來都難倒演戲經驗豐富的Stephy：「我哋嘅故事跨越唔同年代，由1998年到2023年，只能單靠聲線嘅變化，喺好短嘅時間交代唔同年代嘅情節，其實都幾難。當中仲有配音情節，難得見到軒仔扮聲、古靈精怪嘅一面，成件事好好玩。」 軒仔覺得二人再度合作很有默契：「我同Stephy唔係成日見面，但頭先對戲嘅時候，好自然有一份信任，就好似錄醫院嗰場戲，我哋睇到嗰間醫院都係同一Style，唔會一個係英國，一個係香港。我又發現我哋都係風象星座，唔怪得咁有默契。今次錄廣播劇真係好唔夠喉，好想叫編劇月巴加多啲戲份比我同Stephy。」 Ian及Sinnie的故事發生在70年代，Sinnie飾演應屆會考生「黃詩敏」，Ian及Sinnie均做足功課準備今次廣播劇，首次聲演廣播劇的Ian指：「今次演武俠小說作家都幾好玩，我甚少寫小說，但今年出嘅歌背後都會有個故事，同角色都有關聯。故事發生喺70年代，用字就要有番啲年代感，例如『啱啱』會換成『啱先』或者『剛才』。拍劇可以利用表情、肢體動作去配合，廣播劇只係單靠語氣及抑揚頓挫，但過程都幾順利。」 今次是Sinnie第一次與Lolly Talk 以外的人對戲：「我飾演一個有女俠精神嘅會考畢業生，對我嚟講係好大挑戰，所以特別去研究一下70年代嘅人點講嘢，睇咗大事回顧，聽下新聞報道員點報新聞，參考佢哋嘅語氣、助語詞。我除咗會平時字正腔圓，仲會喺句尾加番『呀』、『㗎』，希望比到聽眾70年代嘅感覺。」 黃妍在大學時期修讀新聞與傳理系，今次在廣播劇再演新聞系學生，劇情講述她訪問宣子晴入行，Cath指：「今次廣播劇聲演記者，令我諗番起讀書時期做過一段時間實習記者，成件事好巧合。我本身好鍾意玩廣播劇，錄廣播劇睇唔到樣，只可以利用把聲做表情，要調整自己講嘢嘅節奏同強度，係好有趣好好玩嘅，希望嚟緊都有多啲機會再同其他人一齊玩！」
4 min read
