打機有成功感 陳蕾︰音樂上我都好勝

要陳蕾給自己三個Hashtag，她選擇了「隨緣」、「手作」和「電競」，她說打機帶給她成功感，「打賽車game攞第一會好開心、玩俄羅斯方塊攞第一又會超級開心，我每次贏都會cap圖，其實每一次個畫面都係差唔多，但我就係要記錄低呢一刻，我會儲起第一勳章。」

事業上，陳蕾都開始找到成功感，不同的是，她不會跟別人比較，「我的好勝心到處都會展現出來，音樂上我都好勝，但我只會跟自己比，因為音樂真係好難分勝負，唔似打機，速度快啲、個內彎靚啲就攞到第一，攞到獎亦不等於比別人的歌曲優勝，每個人都可以有佢自己心目中嘅金獎人選，在我來說，當我寫到一首覺得好正的作品，我就覺得已經贏咗。」

陳蕾出道時曾簽約日本唱片公司，跟福山雅治屬同門歌手，公司揚言會為她打開國際市場，但陳蕾覺得與自己的理念背道而馳，最後決定「和平分手」；2017年以獨立歌手身份出歌，開始有歌曲打入流行榜，更連續三年獲得唱作人獎，2019年簽約華納，有更多資源做創作，2020年首次獲叱咤女歌手銀獎，今年成功登上「女金」，終於打大佬。「獨立歌手試過、簽公司又試過，最大分別其實是在於自己，如果你唔知自己想點，其實點行都係冇用，現在這個stage很舒服，冇乜唔滿意，無欲無求的一個狀態。」

在單親家庭長大的陳蕾，性格獨立，17歲已經搬出去自己生活，「我覺得同屋企人有些距離感情先好，好似每一次見面食飯特別多嘢傾，然後，你又會更加珍惜，日日見住都未必覺得家人會變老，見下又會覺得好似係喎，發覺爸爸矮咗少少，佢而家都承認自己縮水，但以前佢會話係咪你高咗咋？其實當時係有少少心酸，因為呢個都係佢第一次經歷的事，身體開始有變化，佢都未老過，可能佢都要啲時間去適應自己，適應個女已經高過自己。」

事業開始起飛，陳蕾說至今父親仍然希望她返廣州生活，打份工做個普通女仔，「就算到現在，佢都唔想我做呢行，爸爸對我嘅健康和快樂係擺第一位，驚我休息唔夠，覺得做呢行好辛苦，我只好不停地向他報平安，就係我每次煲湯、買生果、煮飯都影俾佢睇，等佢知道我識得照顧自己，但我知佢係想我可以同佢近啲，或者佢覺得廣州嘅生活簡單啲慢啲，我哋屋企好簡單，佢覺得而家搵到嘅錢，都足夠生活就可以了，都冇乜需求，在這樣的家庭環境中成長，我都變得很知足。」

問她如果不做歌手，現在的陳蕾會做什麼？「其實我冇乜打過工，以前係做些手作仔到市集賣，整電話殼、整耳環，到現在我個partner都仲有幫我經營住呢個手作平台，『手作』又係一件冇得比的東西，冇第一第二，但又可能滿足到我嘅成功感，我鍾意擺攤檔，因為可以直接跟客人溝通，見到佢客人望住對耳環雙眼發光，嗰一下我就覺得好開心，只要創作出嚟的東西，有人喜歡就好了。」